Starton Faza e Dytë e Re-Debate VII, ja përballjet e shkollave në nivel rajonal

Pas përfundimit me suksesit të fazës së parë, LIBURNETIK njofton fillimin e fazës së dytë të Re-Debate VII, Kampionatit Kombëtar të Debatit, me përfshirjen e shkollave më të mira në nivel rajonal. Ky raund do të sjellë përballje mjaft interesante ndërmjet ekipeve të shkollave me nxënësit më të talentuar në vend.

Edhe këtë edicion, struktura e kampionatit ka mbetur ashtu si në edicionet e kaluara. Debatet në nivel rajoni do të zhvillohen pa short, në qytetet ku Re-Debate ka 2 skuadra. Ndërkohë, në qytetet që janë 3 apo më shumë skuadra do të konsiderohet shorti për ndarjen e tyre duke siguruar një konkurrencë të barabartë për të gjithë skuadrat pjesëmarrëse.

Gjatë këtij edicioni skuadrat do të konkurojnë me tema të ndryshme që kërkojnë një kuptim të thellë të çështjeve aktuale dhe aftësi të forta argumentuese.

Kampionati synon nxisë mendimin kritik dhe të zhvillojë aftësitë e komunikimit të të rinjve, të rrisë vetëdijen e tyre sociale dhe të promovojë respektin dhe mirëkuptimin ndërmjet  mendimit ndryshe. Përveç përfitimeve edukative, Re-Debate VII është një mundësi e shkëlqyer për të rinjtë për të ndërtuar lidhje dhe për të zhvilluar aftësi të rëndësishme të rrjetëzimit që do t’i shërbejnë atyre gjatë gjithë jetës.

Të gjitha përballjet do të transmetohen gjithashtu në rrjetet sociale të organizatës LIBURNETIK dhe faqet e dedikuara të Re-Debate në Instagram, Facebook dhe YouTube.

Re-Debate, Kampionati Kombëtar i Debatit zbatohet nga Organizata LIBURNETIK në partneritet me KRK – Kongresin Rinor Kombëtar, me mbështetjen institucionale të Ministrisë së Arsimit dhe Sportit dhe AKPA. Ky projekt-program mundësohet me mbështetjen e Agjencisë Kombëtare të Rinisë, Ministrit të Shtetit për Rininë dhe Fëmijët si edhe UNICEF Albania përmes projektit ‘Qëndro’ mundësuar nga Qeveria Italiane.